مسرحية عيد القيامة للاطفال

مسرحية عيد القيامة للأطفال

الشخصيات: الشوكة – الحربة – الصليب - المسامير

الفكرة: الشوكة تحكى للأولاد حكايتها ساعة صلب يسوع

المسرحية

- ازيكم يا اولاد، عاملين ايه؟؟ الأول أحب أعرفكم بنفسى، بس قبل ما احكى
لكم بقوللكم عشان خاطرى ما تزعلوش منى كل اللى حصل دا كان غصب عنى الناس
الأشرار هما اللى خلونى أعمل كدا. أنا الشوكة اللى اتحطيت فى راس بابا
يسوع ..... (صوتها بتبكى) اسمعوا يا أولاد انا ح احكيلكم حكايتى من أولها
واسمعونى كويس

أنا طول عمرى مزروعة فى الصحرا، فى الصيف بقف فى عز الحر وفى الشتا بقف
بردو فى عز البرد لكن طول عمرى جامدة وقوية واللى يقرب لى لازم اشكه
واعوره لحد اما ينزل دم و كنت بفرح قوى لما اشوف ولاد صغيرين ولا حتى ناس
كبار بيتشكوا منى وابقى مبسوطة قوى واقول يا سلام يا بت يا شكشوكة برافو
عليكى خليكى كدا طول عمرك جامدة وقوية ما حدش يقدر يقرب لك

وفى يوم من الأيام لاقيت ناس كتير شكلهم جنود كدا لابسين حديد وشكلهم
اقوياء قوى ولاقيتهم جم خدونى من الأرض بتاعتى اللى كنت مزروعة فيها وخدوا
اصحابى الشوك ولموا مننا كتيييييييير قوى.

فسألت اصحابى قلت لهم يا ترى واخدننا على فين دا احنا شوك جامد وناشف قوى قالوا لى انهم زييى ما يعرفوش حاجة.

عارفين يا اولاد احنا شاكينا الحراس جامد قوى فى ايديهم وكل مكان فى ايديهم كان بينزل دم لكن برده ما كانوش بيحرموا ولمونا كلنا.

المهم لاقيهتم بيعملونا زى ضفيرة كدا على شكل تاج يتحط على الراس قلت
لاصحابى يا نهار ابيض دول اكيد ح يحطوه على راس حد هما متضايقين منه قوى
يا ترى مين دا وعمل ايه؟؟؟؟

بعد ما عملونى ضفيرة كبيرة على شكل تاج حطونى جنب حربة وخشب على شكل صليب ومسامير كبيرة قوى ولما سابونى جنبهم اتصاحبت عليهم:

- ازيكم يا مسامير ازيكم يا خشب ازيك يا حربة، انتوا بتعملوا ايه هنا وهما
لمونا كدا ليه؟؟؟؟؟؟؟؟ وايه الناس دى كلها؟؟؟ ومين اللى واقف متعور هناك
دا وعمالين يعذبوه؟؟؟؟

المسمار: انتى لسة جاية جديد يا شوكة ما تعرفيش ايه الحكاية، أنا ح اقوللك يا ستى:

اللى انتى شايفاه هناك دا بابا يسوع طبعاً تعرفيه

- آه طبعاً

- اهه بابا يسوع بيقول للناس دى ان هو المسيح ابن الله والناس مش مصدقينه عشان كدا قالوا ح يصلبوه على الصليب

- يااااااه يا عينى طيب والحربة والخشب دول ح يعملوا ايه؟؟؟؟

- الخشب: انا اللى ح يتعلق علىً بابا يسوع

- الحربة: وانا كانوا عمالين يضربوه بىً

- يااااااه وهو كان بيعمل ايه اكيد كان عمال يزعق لهم جامد قوى

- لا بالعكس خالص دا هادى خالص ومستحمل ومش بيزعق ولا حاجة دا حتى وشه جميل قوى ومريح

- طيب واحنا مش ممكن نقوللهم سيبونا احنا مش عايزين نشكه ولا نعوره؟؟؟؟ ونقوللهم ما تعملوش فيه كدا؟؟؟

- لا طبعاً احنا مانقدرش لأن الحراس دول أقوية جدااااً وح ياخدونا بالعافية

- الشوكة: طيب وانا ح يعموا بىً ايه؟؟؟ انا صحيح بفرح لما بشوك الناس بس
انا المرة دى خايفة قوى مش عارفة ليه وصعبان علىً قوى بابا يسوع

- المسمار: انتى ح يحطوكى على راسه

- طيب وليه العذابات دى كلها

- ما انا قلت لك عشان هو بيقول انه ملك اليهود وهما بيقولوا له انت انسان عادى ما ينفعش تقول الكلام دا

- طيب ومافيش حد يدافع عنه؟؟؟؟

- لأ – مامته اهه هناك اسمها ماما العدراء عمالة تعيط يا عينى ومش قادرة تعمل له حاجة

صوت الحراس: - ياللا بينا هوب – هوب تعالى يا شوكه تعالوا يا مسامير تعالى
يا خشبة احنا ح نصلب الراجل دا عشان هو بيقول انه المسيح ابن الله

صوت الراوى:ويوم الجمعة الصبح:

- انا بيلاطس البنطى قول لى يا يسوع انت بتقول ان انت ملك اليهود الكلام دا حقيقى؟؟؟

- ايوه حقيقى زى ما انت قلت بالضبط

- طيب الناس كلها عايزيننى اصلبك

صوت الراوى: وفعلاً يا أولاد صلبوا بابا يسوع يوم الجمعة اللى احنا
بنسميها الجمعة العظيمة وجه يوسف الرامى اللى كان من تلاميذ بابا يسوع
عشان ياخد جسد بابا يسوع ويدفنه فى القبر وفعلاً خده وبيلاطس بعت معاه
حراس كتير عشان يختموا الحجر ويوقفوا حراس عليه عشان ما يجيش تلاميذ بابا
يسوع ياخدوه بالليل.

وفعلاً حطوا الأختام ووقفوا الحراس، لكن يوم الحد الفجر حصلت حاجة غريبة خالص

جت المريمات عشان يحطوا الحنوط والعطور على جسد بابا يسوع لقوا حاجة غريبة
جدااا عارفين لقوا ايه؟؟؟؟؟ لقوا الحجر متدحرج وجسد بابا يسوع مش موجود
فخافوا جداً وقالوا ايه دا ازاى دا حصل يا ترى حد سرق جسد بابا يسوع؟؟؟ بس
الأكفان فى مكانها ومترتبة كويس قوى والحراس ما سابوش مكانهم ابداً.

ومريم المجدلية اللى كانت أول واحدة تروح للقبر لاقيت واحد بيكلمها
افتكرته البستانى وسألته عن بابا يسوع وأول ما قاللها يا مريم عرفت انه هو
بابا يسوع وعرفها انه قام من الأموات وانتصر عالموت.

نرجع تانى للشوكة اللى بتحكى الأحداث:

- شفتوا بقى يا أولاد انا ما كنتش عايزة اشك بابا يسوع صدقونى خالص بس هما
الحراس اللى غرزونى فى راسه سامحنى يا بابا يسوع ارجوك انت عارف انه غصب
عنى.

وعايزة اقوللكم حاجة كمان يا أولاد احنا بنحتفل بعيد القيامة كل سنة بيكون
يوم حد عشان بابا يسوع اتصلب يوم الجمعة وقام من الأموات فجر يوم الحد
عشان كدا العيد لازم يكون يوم حد.

وبكدا أبقى انا حكيت لكم حكاية الصلب والقيامة يا رب تكون عجبتكم

النهاية

جميلة جدا جدا جدا
برافوا عليكي
انتي بتعرفي تكتبي سيناريو و حوار كويس
بجد ممكن تتمثل بأطفال
ميرسي يا ميرا
عقبال الأخراج
ههههههههههه

لالالالالالالالالالا
مش انا اللى كتباة يا نادر
جبتة كان على النت
ربنا يعوض اللى تعب وكتبة لانة عجبنى اوى فكرتة

» فكرة رسومااااات للوجوة للاطفال